Ick stell mi vör, ick kem as Tourist

nah Niegenkalen un sall na to Hus vertellen as mi dat  hier geföllt.

Ick will dat eis verseuken:

Kümmt man ut Malchin ut dat Holt rut un süht de lütte Stadt vör sik, süht dat doch orrig gaud ut. De Hüs sünd upfidumt, hier un dor gift dat noch wat tau daun. Dat  licht an de Husbesitter, de dor nich wohnen un allns  loten as dat is. Dat sünd nich tau vähl. Manch einer gift dem Hus ne persöhnliche Note. Dat is gaud.

Taun Inköpen hebben wi twei Möglichkeiten. Hier gift dat wat taun Faudern und süs noch wat. Ein Fleischer, ein Bäcker, ein Blaumengeschäft, drei Horschnieder, ein Afteik, ein Laden för Spältüch un anner Soken, ein Poststell mit Kurzwaren,  twei Podologen, ein Verschönerungssalon, twei Praxen vör Physiotherapie, ein Doktor vör dat Mulwark, ein Doktor för den Rest  des Minschen. Sös mol teuft ein Kräuger up di und Kinnergorn sünd twei dor. Wat wi noch hebben is ´ne Spatzenschaul. Eine Kark steit neben dat Rathus.  För eine lütte Stadt mit ca 1000 Inwohners doch ein gaudes Angebot.

De Straten sünd mit 2-3 Utnahmen all saniert. Doch ick wull as Tourist de Sok bekieken. Dat gift einen Häben, von dem ut man de ganze Welt mit dat Boot  afschippern kann. Dat Boot kan jedwerein in Niegenkalen schartern. Twei Stunn Liehrgang und Leinen los. De Peen dal, dörch den Kummerower See , an de Aalbaud vörbie bet int Oderhaff un wierer in de Ostsee. (As ick noch tau Schaul wier, heet dat Oderhaff, hüt heit dat Stettiner Haff).

Kümmt man mit Wohnmobiel orrer Wohnanhänger in de Stadt und söcht einen orrigen Platz um dat Geschütz uptaustellen, gift dat twei Möglichkeiten. Einmol an Häben und dann de Peen upwarts bi de Isenbahnbrügg, hier führt kein Toch miehr, sondern Draisinen von Dargun nah Salem und werrer tröch. Ein groter Platz mit noch mier Möglichkeiten, sik den besten Standurt uttauseuken, gift dat hier.

Von Niegenkalen ut kann man im Holt wandern. Dat gift väle Wanderwege. Taun Bispill nah de Friedrich Franz Höhe un wierer na de Marienhöhe und wer noch nich nauch het, löpt bet na den Hesterbarg. Dat sünd noch nich all Möglichkeiten taun wandern. Mit dat Fohrrad kann man de ganze Feldmark und wierer afklappern. Dargun, Aalbaud, Pohnsdörp, Lelkendörp mit Tierrassenpark, Remplin mit Stiernwarte un mierere anner Möglichkeiten. Wenn ein Minsch de Rauh söcht, is hei hier an ne richtige Stell. Will hei wat erläben, kann hei in ne gaude Stunn nah Pierknüppel führn. Dor und in Warnemün het hei Trubel un Läben nauch. Mann kümmt ok fix nah Stralsund und Greifswald. Möchlichkeiten taun Öwernachten hemm wi ok. Am Häben, in Warsow und private Quartiere kann man buchen.

Mit Bademöchlichkeiten is dat man nich so gaud. An de Peen is ne lütt Badestell. För de Görn is dat gaud. De Peen is dor nich deip. Ne Möchlichkeit gift dat noch in Salem. Ick glöw, ick hef allns upschräwen, wat man vertellen kann.

Karl-Friedrich Lenz