Radtour nach Dargun am 29. Juli 2015
Karl-Friedrich Lenz
In´t Finster von uns Heimatstuf hüng ein Uthang, dat alle Mitglieder det Heimatverein tau ne Radtour inlad würn. De Dach kem ran, ok de Tiet, söben Lüd wulln mitführn. Wi teuften noch vief Minuten, dor wier Strat up, Strat dol kein Radfohrer tau sein. Nu güng dat ja nu los. As wi up de Reeperbahn wieren, gef dat wat vom Häben un wi müßten uns unner ´ne Kastanie stellen, um nich nat tau warn. Dat füng jo gaud an. As dat Drüppeln uphürt har, führten wi wierer. De nächst Stop wier dat olle Trafohus bi´n ollen Sportplatz. Nu stünn ein nieges lüttes Teil doneben. Dat Oll ist utmustert und sall as Tierhotel utbugt warn; nich för Piert un Swien, sondern för Fledermüs un Uhu.
Wi radeln wierer un bliben bie de Infotafel in Nie Warsow stahn un informierten uns öwer de Geschicht von Nie Warsow. Un wierer güng de Fohrt. Bevör wi in den Busch kemen, hebben wi beten wiet af dörtig Kraunen seihn. Im Busch führten wi bargup un bargdal. Besonders de Kopheisterbarg wier gaud. Nah Kützerhoff tau wier dat nich miehr wiet. Ok güng dat gaut bargdal. De Wechwieser gew uns de Richtung nah Dargun an un wi wieren vergneugt bi de Sok. An Wischen un Felder vörbie kemen wi nah Altbuhoff. Eine Ihrenrunde üm dat Schloß hebben wi ok dreit. Bi de Unnermöhl het de nie upbugt Fischtrepp uns Taustimmung krägen. Un wierer güng dat nah den Bahnhoff in Dargun. Ein Toch stünn för uns nich bereit, de uns nah Niegenkalen bringen künn. De is all lang afführt un mit de Draisine wulln wi nich los. Mit Kanu, de man ok utborgen künn, dat glike Males. Statt des Bahnhofvorstehers wier dor ´ne schmucke Diern mit ehren Mann un böt Kaffee un sülfs backt Kauken an. Wi hebben also Rast mokt un uns för den Rückwech stärkt. Dat Café im Bahnhoff kann man gaut wierer empfehlen.
Nachdem wi uns utrauht un stärkt haren, klabasterten wi up uns Fohrröh un af güng de Post. Dargun Utbau wier de nächst markante Punkt, wo wi de Landstrat na Niegenkalen verloten hebben. Jetzt kem ein schöner Wech bet an den Wald ran. Hier sünd ok de Brunnen von de Bruerie, wo se dat Worer för Bier un anner Getränke her bekommen. Äwer nu güng dat los. Dunner, Blitz un Rägen as för dull! Glücklicher wies harn wi all Regentüch dorbie un dor künn uns dat Natte von baben nichts anhebben. Wi verpusteten uns ne Wiel, bet de Rägen sachter wür un dörch den Wald wiern wi bald in Wagun. In Wagun un spärer in Schwartenhoff hebben wi kein Paus mokt, sondern ihrst vör dat Schlot von Fru Antoni in Schorrentin. Hier hebben wi beten klauk schnakt un dunn güng dat in de letzt Etapp, hen nah Niegenkalen. Vom Abzweig nah Schönkamp güng dat man furtzens ümmer bargdal. Keine Anstrengung wier miehr nödig. Up den Markt, den Anfangspunkt uns Fohrt, wier ok Schluß. De Wärergott het dat gaut mit uns meint. Wi harn fast allens, wat man sik wünschen künn: Sünnenschien, sachter Rägen, duller Rägen, Blitz, Dunner, Wärme, Küll. Nur Frost un Schnei hem noch fählt - dat hebbn wi äwer nich brukt.
De Utfluch up dat Rad het allen gefollen. Dat wier ok nich tau anstrengend. De nächst Tour kümmt bestimmt, denn nah de Tour is vör de Tour. Un up miehr Radler hoffen wi all.
Auch Regen gab es